ޒައިނާގެ ލޮލުން ފޭބި ކަރުނަތިކި އަތުގެ ނުފުށުން ފޮހެލަމުން، ރާނިޔާއަށް ބަލާލިއެވެ. “އާނ ރާނިޔާ، އަހަންނަށް އެނގޭ މަންމައަށް ކޮންމެވެސް ދުވަހަކުން މިކަން އެނގޭނެކަން. އެކަމަކު މިވަގުތު އެ ހިތްވަރެއް އަހަރެންގެ ނެތް. މި ހުރިހާ ދުވަހު އަހަރެން މި އުޅުނީ އޭނާގެ ހަނދާންތަކާ ދުރުވާން ކަމަށް ހެދިގެން، އެކަމަކު ހަގީގަތަކީ ކޮންމެ ސިކުންތަކުވެސް އަހަރެން މި އުޅެނީ އެ ހަނދާންތަކުގެ ތެރޭގައިކަން،” ޒައިނާގެ އަޑު މަޑުވެފައި ތުރުތުރުލަމުން ދިޔައެވެ.
ފިނި ވަޔާއެކު ވެހެން ފެށި ކުދިކުދި ސުނޯތައް ޒައިނާގެ އިސްތަށިގަނޑުގައި ހަރުލަމުން ދިޔައެވެ. ރާނިޔާ، ޒައިނާގެ އަތުގައި ބާރަށް ހިފާލިއެވެ. “ކާކުތަ އެއީ؟ ރާއްޖޭގައި އުޅުނުއިރު އެހާ ގާތްކޮށް އުޅުނުއިރުވެސް އަހަންނަށް ނޭނގޭ ވަރުގެ ކާކުތަ އެއީ؟” ރާނިޔާގެ ސުވާލުން ޒައިނާ އިސްޖަހާލިއެވެ.
ޒައިނާ ފުން ނޭވާއެއް ދޫކޮށްލުމަށްފަހު ފޯނު ނަގައި، އޭނާގެ ‘އާކައިވް’ ކޮށްފައިވާ މެސެޖުތައް ހުޅުވާލިއެވެ. އޭގައި ވަނީ އެތައް ސަތޭކަ މެސެޖެކެވެ. “އަހަރެން ލަންޑަނަށް މިއައީ އޭނާއާ ދުރުވާން ވެގެން. އަހަރެމެންގެ ދެމެދުގައި އޮތް ގުޅުމަށް އާއިލާއިން ދުވަހަކުވެސް ގަބޫލެއް ނުވާނެ. އޭނާއަކީ މަންމަމެން އެންމެ ނަފްރަތުކުރާ އާއިލާގެ ކުއްޖަކަށްވީތީ،” ޒައިނާ ކިޔައިދޭން ފެށިއެވެ.
“އެއީ އިޔާން… ރާނިޔާއަށް ހަނދާން ހުރޭތަ؟ ސްކޫލް ނިންމި އަހަރު އަހަރެމެންގެ ގެއަށް އައި އިޔާން؟” ޒައިނާގެ މި ބަހާއެކު ރާނިޔާ ސިހުނެވެ. “ކީކޭ؟ އިޔާންއޭ؟ އެއީ ޒުލޭހާ ދައްތަގެ އެންމެ ބޮޑު ދުޝްމަނުގެ ދަރިއެއްނު!” ރާނިޔާގެ ދެލޯ ބޮޑުވިއެވެ.
“އާނ، އެއީ މައްސަލައަކީ. އަހަރެމެންގެ ހިތުގައި އުފެދުނު ލޯބި މަރުވާކަށް ބޭނުމެއް ނުވި. އެކަމަކު އާއިލާގެ އުފަލަށްޓަކައި އަހަރެން މިހުރީ އޭނާގެ މެސެޖުތަކަށް ޖަވާބު ނުދީ، ދުރުގައި ހުންނަން ނިންމައިގެން. އެކަމަކު ދުރުވާން ޖެހުނަސް، މި ހިތުން އޭނާގެ ނަން ފޮހެލެވޭނެ ގޮތެއް އަހަންނަކަށް ނޭނގުނު،” ޒައިނާގެ ލޮލުން އަނެއްކާވެސް ކަރުނަ އޮހިގަތެވެ.
އިރުއޮއްސި އަނދިރިވަމުން ދިޔައިރު، ޕާކުގެ ހޮޅިބުރިތައް ދިއްލެން ފެށިއެވެ. ޒައިނާ އާއި ރާނިޔާ މަޑުމަޑުން ގޮނޑިން ތެދުވެ ގެއާ ދިމާއަށް ހިނގައިގަތެވެ. ޒައިނާގެ ހިތުގައި އޮތް ބަރު ބޮޑު ސިއްރު ރާނިޔާއަށް ކިޔައިދެވުމުން ކޮންމެވެސް ވަރެއްގެ ލުޔެއް ލިބުނު ނަމަވެސް، ކުރިމަތީގައި އޮތީ އުނދަގޫ ދުވަސްތަކެއްކަން އޭނާއަށް އެނގެއެވެ. މަންމަގެ ކުރިމަތީގައި އާދައިގެ ގޮތަކަށް އުޅެން މަސައްކަތް ކުރަމުން، ޒައިނާ ހިތާހިތުން ބުނެލިއެވެ. “އިޔާން… އަހަރެން މިހުރީ ވަރަށް ދުރުގައި، އެކަމަކު ވަރަށް ގާތުގައި.”
Leave a Reply