އެޑޯބްގެ އުފެއްދުންތެރި ވަސީލަތްތަކުގެ ތެރޭގައި އާޓިފިޝަލް އިންޓެލިޖެންސް (އޭ.އައި) ގެ ބޭނުން ފުޅާކުރަމުން ދަނިކޮށް، ތަސްވީރުތައް އިވެލުއޭޓްކޮށް ފާޑުކިޔުމުގެ ގާބިލްކަން ހުރި އާ ފީޗާއެއް އެ ކުންފުނިން ތައާރަފްކޮށްފިއެވެ. މިއީ ތަސްވީރު އުފެއްދުން ނުވަތަ އެޑިޓް ކުރުމަށްވުރެ ބޮޑަށް، ފޮޓޯގްރަފީގެ ފަންނީ މިންގަނޑުތަކަށް ބަލައި ޚިޔާލުފާޅުކުރާ ނިޒާމަކަށް ވުމުން، މިއީ މިހާތަނަށް ފޮޓޯގްރަފީގެ ދާއިރާގައި އޭ.އައި ބޭނުންކުރުމާ މެދު އެންމެ ބޮޑަށް ބަހުސް ކުރެވޭ އެއް ކަމަށް ވަނީ ވެފައެވެ.
އެޑޯބުން އިއުލާން ކުރި ތަޖުރިބާ މަޝްރޫއެއް ކަމަށްވާ “ޕްރޮޖެކްޓް އިންޑިގޯ” އެޕްގެ ތެރެއިން “ފޮޓޯ ގައިޑެންސް” ގެ ނަމުގައި މި އާ ފީޗާ ވަނީ ތައާރަފްކޮށްފައެވެ. މި ފީޗާގެ މައިގަނޑު ބޭނުމަކީ އޭ.އައި މޮޑެލްތަކަށް ބަރޯސާވެ ތަސްވީރުތައް ތަހުލީލުކޮށް، ޓެކްނިކަލް ފީޑްބެކާއި ފޮޓޯ ރަނގަޅު ކުރުމަށް ބޭނުންވާނެ ހުށަހެޅުންތައް ފޯރުކޮށްދިނުމެވެ.
މި ފިޔަވަޅަކީ އެޑޯބްގެ އޭ.އައި ފަލްސަފާއަށް އައި ބޮޑު ބަދަލެކެވެ. މީގެ ކުރިން ހަމައެކަނި ޔޫޒަރ ކޮމާންޑްތައް ތަންފީޒުކުރުމުގެ ބަދަލުގައި، މިހާރު މި ސިސްޓަމް މަސައްކަތް ކުރާނީ ފޮޓޯގްރަފީގެ އުސޫލުތަކަށް ބިނާކޮށް ފަންނީ ލަފާދޭ “ކްރިއޭޓިވް އެސިސްޓެންޓެއް” ގެ ގޮތުގައެވެ.
އާ ފީޗާ މަސައްކަތް ކުރާ ގޮތް
ޕްރޮޖެކްޓް އިންޑިގޯ އެޕްގެ “އޭއައި ޕްލޭގްރައުންޑް” ޕެކޭޖުގެ ބައެއްގެ ގޮތުގައި ހިމެނޭ މި ފީޗާއިން، ހަމައެކަނި ފޮޓޯ އެޑިޓްކުރުމުގެ ބަދަލުގައި، ފޮޓޯގެ ކޮމްޕޮޒިޝަން، ލައިޓިން، އެކްސްޕޯޝަރ، އަދި ކުލަތައް ހުރި ގޮތް ތަހުލީލު ކުރެއެވެ. އަދި ބަލާ މީހާގެ ލޮލަށް ފޮޓޯ ފެންނަ ގޮތާއި، އޭގެ ވިޝުއަލް އަދި އިމޯޝަނަލް އިމްޕެކްޓަށް ބަލައި ތަހުލީލުތައް ފަށައެވެ.
މި ތަހުލީލުތަކަށްފަހު، ޕްރޮފެޝަނަލް ފޮޓޯގްރަފީ އިންސްޓްރަކްޓަރެއް ފަދައިން ލިޔުމުން ފީޑްބެކް ދެއެވެ. އޭގެ ތެރޭގައި ފޮޓޯގެ ވަރުގަދަ ކަންކަމާއި ބަލިކަށި ކަންތައްތައް ފާހަގަކޮށް، ނަތީޖާ ރަނގަޅު ކުރުމަށް އަމަލީ ހުށަހެޅުންތައް ހުށަހަޅައެވެ.
ރީޝޫޓް ކުރުމުގެ ކުރިން ދޭ އިރުޝާދުތައް
މި ޓޫލްގެ ހާއްސަ ކަމަކީ، ފޮޓޯ ނެގުމަށްފަހު ފާޑުކިޔުމުގެ އިތުރުން، ރަނގަޅު ގޮތުގައި ފޮޓޯ އަލުން ނެގުމަށް (ރީޝޫޓް ކުރުމަށް) ލަފާދޭ ކަމެވެ. މިސާލަކަށް މަންޒަރުގެ ތެރޭގައި ހުންނަ ބޭނުން ނުވާ އެއްޗެއް ފްރޭމުން ނަގައި، ޝޫޓިން އެންގްލް ބަދަލުކޮށް، ކެމެރާގެ ޕޮޒިޝަން އެޖެސްޓްކުރުމަށް މިއިން އިރުޝާދު ދެއެވެ. އަދި މިހާރު ހުރި ތަސްވީރެއް އިތުރަށް ފުރިހަމަ ކުރުމަށް އެޑޯބް ލައިޓްރޫމް ޓޫލްސް ބޭނުން ކުރާނެ ގޮތުގެ ހުށަހެޅުންތައް ވެސް މީގައި ހިމެނެއެވެ.
ޓެކްނޮލޮޖީގެ ފަހަތުގައިވަނީ ކޮން އެއްޗެއް؟
ޝައުގުވެރިވާ ކަމަކީ، މި ފީޗާގައި އެޑޯބްގެ އަމިއްލަ “ފަޔަރފްލައި” މޮޑެލްގެ ބަދަލުގައި، އެކްސްޕެރިމެންޓަލް ވާޝަންގައި ބޭނުންކޮށްފައިވަނީ ގޫގުލްގެ “ނޭނޯ ބަނާނާ” މޮޑެލްއެވެ. އެ ކުންފުނިން ބުނާ ގޮތުގައި މިއީ ރިސާޗް ޕްރޮޖެކްޓެއްގެ ބާވަތުން ނިންމި ނިންމުމެއް ކަމަށާއި، ކުރިއަށް އޮތްތަނުގައި ޔޫޒަރުންގެ ބޭނުންތަކަށް ބަލައި މޮޑެލް ބަދަލުކުރުމުގެ ފުރުސަތު އޮތް ކަމަށެވެ.
ކަންބޮޑުވުންތަކާއި ބަހުސް
މި މަޝްރޫއަކީ ފޮޓޯގްރަފީގެ އަސާސްތައް ދަސްކުރުމަށް އެހީތެރިވެދޭނެ “ލާނިން އެއިޑް” އެއް ކަމަށް އުފެއްދުންތެރިން ބުނި ނަމަވެސް، ފޮޓޯގްރާފަރުންގެ މެދުގައި ބައެއް ކަންބޮޑުވުންތައް އެބަހުއްޓެވެ. ބައެއް ފަރާތްތަކުން ގަބޫލުކުރާ ގޮތުގައި އޭ.އައި އިން ވަކި ގަވާއިދުތަކަކަށް ފޮޓޯ ފިައްތަން މަސައްކަތް ކުރުމުން، އަމިއްލަ އުފެއްދުންތެރިކަމާއި ތަފާތު ސްޓައިލްތަކަށް ހުރަސް އެޅިދާނެއެވެ.
ޕްރޮޖެކްޓް އިންޑިގޯގެ މި އާ ފީޗާ މިހާރު މަޑުމަޑުން އައިފޯން ޔޫޒަރުންނަށް (ވާޝަން 1.1 ގައި) ތައާރަފް ކުރަމުންދާއިރު، މިވަގުތު މި ޓޫލްތައް ބޭނުންކުރެވެނީ މުޅިން ހިލޭ، އެޑޯބް އެކައުންޓަކާ ނުލައެވެ. ކުރިއަށް އޮތްތަނުގައި ޓެސްޓްތަކުގެ ނަތީޖާއަށް ބަލައި، މި ޚިދުމަތް ލިބޭނެ ގޮތަށް ބަދަލުތަކެއް އަތުވެދާނެ ކަމަށް އެޑޯބުން ބުނެއެވެ.
Leave a Reply