ހިތުގެ ރާގު

އުމުރުން އެންމެ ސޯޅަ އަހަރުގެ ކައިރާގެ މުޅި ދުނިޔެ ގުޅިފައިވަނީ ހިތްގައިމު އަޑަކާއެވެ. އެއީ ދިވެހިރާއްޖޭގެ މިއުޒިކީ އުދަރެހުގައި އެންމެ ވިދަމުންދިޔަ މަޝްހޫރު ލަވަކިޔުންތެރިޔާގެ ޖާދުވީ އަޑެވެ. ރޭޑިއޯއިންނާއި ޓީވީން އޭނާގެ ލަވަތައް އިވޭ ކޮންމެ ފަހަރަކު، ކައިރާގެ ޅަ ހިތް ނޭނގޭ އުފަލަކުން ފުރިގެންދެއެވެ. ކޮޓަރީގެ ފާރުތަކުގައި ހަރުކޮށްފައިވާ އޭނާގެ ތަސްވީރުތަކާއި، ފޯނުގައި ރައްކާކުރެވިފައިވާ ލަވަތަކަކީ ކައިރާގެ ދުވަހީ ދިރިއުޅުމުގެ މުހިންމު އެއްބައެވެ. ނަމަވެސް، އެއީ ދުވަހަކުވެސް ހަޤީޤަތަކަށް ވެދާނެ ލޯތްބެއް ކަމަކަށް އޭރަކު އޭނާގެ ހިތަކަށް ނާރައެވެ. އެއީ ހަމައެކަނި ޅަފުރައިގެ ޚިޔާލީ ދުނިޔެއެއް ކަމުގައި އޭނާ ދެކުނެވެ.

ދުވަސްތައް އޭގެ ހަލުވި ދުވެލީގައި ފާއިތުވަމުން ގޮސް، ކައިރާގެ އުމުރުން ނަވާރަ އަހަރު ފުރުނު އަހަރެވެ. ދަރުބާރުގޭގައި ބޭއްވުނު ބޮޑު ވިޔަފާރި އެކްސްޕޯއެއްގެ ސްޓޯލެއްގައި މަސައްކަތްކުރަން ހުރި ކައިރާއަށް ލިބުނީ ކުއްލި ސިހުމަކާއި ހައިރާންކަމެކެވެ. އޭނާގެ ކުރިމަތީގައި، ހިނިތުންވެލައިގެން ހުރީ އޭނާގެ ހިތް އެދިއެދި ހުރި ލަވަކިޔުންތެރިޔާއެވެ. ފުރަތަމަ ފެނިލުމުންވެސް އެ ދެމެދުގައި ބަޔާންކުރަން ދަތި އާދަޔާޚިލާފު ގުޅުމެއް އުފެދިގެން ދިޔައެވެ. ކައިރާގެ ހިތްހެޔޮކަމާއި، ލަދުވެތި އަދި މަޑުމައިތިރި މިޒާޖު އެ ޒުވާނާގެ ހިތް އެއްކޮށް ދަމައިގަތެވެ. އެ ކުޑަކުޑަ ބައްދަލުވުން މަޑުމަޑުން ބަދަލުވެގެން ދިޔައީ ވަރުގަދަ، އިޚްލާޞްތެރި ލޯބީގެ ގުޅުމަކަށެވެ. މާ ގިނަ ދުވަސްތަކެއް ނުވެ، ދެ އާއިލާގެ ރުހުމާއި ބަރަކާތާއެކު ދެމީހުން ކައިވެނީގެ މާތް ގޮށް ބަދެލިއެވެ.

ކައިވެންޏަށް އަހަރެއް ފުރުނުތަނާ، އެމީހުންގެ ކުޑަކުޑަ އާއިލާއަށް އިތުރު ފުރިހަމަކަމަކާއި އުފާވެރިކަމެއް ގެނެސްދިނީ ލޯބިލޯބި ފިރިހެން ކުއްޖަކު ލިބުމުންނެވެ. ފިރިމީހާއަކީ އަނބިމީހާއަށް އިންތިހާއަށް އަޅާލާ، ލޯބިވާ ބައިވެރިއެކެވެ. އަދި ދަރިފުޅަށްޓަކައި ފުރާނައިން ޤުރުބާންވާން ތައްޔާރަށް ހުރި އޯގާތެރި ބައްޕައެކެވެ. ނަމަވެސް، ދުނިޔޭގެ ދިރިއުޅުމުގެ އުފާވެރިކަމަކީ އަބަދު ދެމިއޮންނަ އެއްޗެއް ނޫންކަން ސާބިތުވީ ވަރަށްވެސް ހިތްދަތި، ހިތާމަވެރި ގޮތަކަށެވެ.

އެއްރެއަކު، މާލޭގައި އޮތް ބޮޑު މިއުޒިކް ޝޯއެއްގައި ލަވަކިޔުމަށް ފިރިމީހާ ދިޔައީ ކައިރާ ގޮވައިގެން ދާން ވަރަށް ބޮޑަށް އެދެމުންނެވެ. އެހެންނަމަވެސް، ކުޑަ ދަރިފުޅު ގޮވައިގެން އެފަދަ ގަދަ އަޑުފައްގަނޑު ބޮޑު ތަނަކަށް ދާން އުނދަގޫވާނެތީ ކައިރާ ނިންމީ ގޭގައި މަޑުކުރާށެވެ. ޝޯ ނިންމާލުމަށްފަހު، ލޯބިވާ އަނބިމީހާއާއި ދަރިފުޅުގެ ގާތަށް އައުމަށް ފިރިމީހާ އެނބުރި ދަތުރުފެށިއެވެ. ނަމަވެސް، ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލުން ނެއްޓި، އޭނާ ދަތުރުކުރި ކާރުގައި ބާރަށް ޖެހި ހިނގި ނުރައްކާތެރި އެކްސިޑެންޓެއްގައި އޭނާ މި ފަނާވަނިވި ދުނިޔެއާ ވަކިވިއެވެ. ހޮސްޕިޓަލުން ލިބުނު އެ ހިތާމަވެރި ޚަބަރު ވެގެންދިޔައީ ކައިރާގެ މުޅި ދިރިއުޅުން އެފުށްމިފުށަށް ޖަހައިލި ބިރުވެރި ތޫފާނަކަށެވެ.

ފިރިމީހާ ނިޔާވިފަހުން އެކަނިވެރިކަމާއި ހިތާމައިގައި އަހަރުތައް ފާއިތުވަމުން ދިޔައެވެ. ކައިރާ ހިތްވަރުކޮށްފައި ދިރިއުޅުމާއިގެން ކުރިއަށް ދިޔައީ ހަމައެކަނި ފިރިމީހާގެ ހަނދާނެއްގެ ގޮތުގައި ހުރި ލޯބިވާ ދަރިފުޅަށްޓަކައެވެ. ދަރިފުޅު ބޮޑުވަމުން އައި ވަރަކަށް، ކައިރާއަށް ފެންނަމުން ދިޔައީ އޭނާގެ ބައްޕަގެ ފުރިހަމަ ސޫރައެވެ. ދަރިފުޅުގެ ހިނިތުންވުމާއި، ލޮލުގެ ކުލަވަރާއި، ހިނގާބިނގާވެ އުޅުމުގެ ހަރަކާތްތައް އެއްގޮތީ ކައިރާގެ ލޯބިވާ ފިރިމީހާއާއެވެ.

އެއްދުވަހަކު، ކޮޓަރީގައި ފިރިމީހާގެ ހަނދާންތަކުގައި ގެއްލިފައި އިން ކައިރާގެ ކަންފަތުގައި ޖެހުނީ ވަރަށް ރީތި، އަސަރުގަދަ އަޑެކެވެ. އެއީ ފިރިމީހާ ދުނިޔޭގައި ހުރިއިރު ދަރިފުޅު ނިންދަވަން އަބަދުވެސް ކިޔައިދޭ މަޝްހޫރު ނާނާގެ އަޑެވެ. އެއްވެސް މީހަކު ދަސްކޮށްނުދެނީސް، ތިން އަހަރުގެ ދަރިފުޅު އޭގެ ކުޑަކުޑަ އަޑުން އެ ނާނާ ކިޔަމުން ދިޔައީ ހަމަ ބައްޕަ ކިޔައިދިން ރީތި ރާގަށެވެ. އެ އަޑުގައި ހުރި ޖާދުވީ އަސަރާއި، ބައްޕަގެ އަޑާ ހުރި އެއްގޮތްކަން އިހުސާސްވެ، ކައިރާގެ ދެލޮލުން ކަރުނަ ހިފެހެއްޓުމެއްނެތި ފައިބައިގަތެވެ.

ކައިރާ ދުވެފައި ގޮސް ދަރިފުޅު އުރާލައި، މޭގައި ބާރަށް ޖައްސައިލިއެވެ. އެވަގުތު އޭނާގެ ހިތަށް ބަޔާންކުރަން ދަތި ފިނިކަމެއް ލިބިގެންދިޔައެވެ. ފިރިމީހާ ޖިސްމާނީ ގޮތުން މި ދުނިޔެ ދޫކޮށް ވަކިވެދިޔަ ނަމަވެސް، އޭނާގެ ލޯތްބާއި، ހަނދާންތަކާއި، ހިތުގެ ރާގު، އެ ދަރިފުޅުގެ ޒަރީއާއިން އަބަދުވެސް މި ދުނިޔޭގައި ދިރިހުންނާނެކަން ކައިރާއަށް ޔަޤީންވިއެވެ.

ހަސަން އަރީން ( އެޑީ )