ދުނިޔޭގެ މަޝްހޫރު ފެތުމުގެ ސާމާނު އުފައްދާ ކުންފުނި، ސްޕީޑޯ އިން ސްމާޓް ވެއަރަބަލް ޑިވައިސްތަކުގެ މާކެޓަށް އިންގިލާބީ އާ ޓެކްނޮލޮޖީއެއް ތަޢާރަފުކޮށްފިއެވެ. “ސްޕީޑޯ އައިކިއު” (Speedo IQ) ގެ ނަމުގައި ތަޢާރަފުކުރި މި އާ އީޖާދަކީ ފެތުންތެރިޔާ ފެނުގައި ހުންނައިރު ލޮލުގެ ކުރިމަތިން ސްކްރީނަކުން މަޢުލޫމާތު ދެއްކުމުގެ ބަދަލުގައި، ފަތަމުންދާއިރު ހުރިހާ ޑޭޓާއެއް ބެކްގްރައުންޑުގައި ރެކޯޑުކޮށް، ފަރިތަކުރުންތައް ނިމުމުން ޚާއްޞަ މޯބައިލް އެޕްލިކޭޝަނެއް މެދުވެރިކޮށް ތަހުލީލުތައް ދައްކައިދޭ ގޮތަށް ފަރުމާކޮށްފައިވާ ނިޒާމެކެވެ.
ބެކްގްރައުންޑްގައި މަސައްކަތްކުރާ ޒަމާނީ ސެންސަރުތައް
ސްޕީޑޯ އައިކިއު ބިނާވެފައިވަނީ އެ ކުންފުނީގެ މަޤްބޫލު “ވެންކިޝާ 3.0” ގޮގްލްސްއާ ގުޅުވައިލެވޭ، އަދި ވަކިކޮށްލެވޭ (ރިމޫވެބަލް) ސްމާޓް ޓްރެކިން ޔުނިޓެއްގެ މައްޗަށެވެ. މި ޔުނިޓުގައި ހިމެނޭ ޚާއްޞަ ސެންސަރުތަކުން ފެތުންތެރިޔާގެ ހަރަކާތްތަކާއި ޓެކްނިކަލް މަޢުލޫމާތުތައް ފުރިހަމައަށް ރެކޯޑުކުރެއެވެ. އަދި އައިނު ބަދަލުކުރަން ޖެހުނު ނަމަވެސް، މި ސްމާޓް ޔުނިޓް ވަކިކޮށް އައު ގޮގްލްސްއަށް ލައްވައިގެން ބޭނުންކުރެވޭތީ، މުޅިން އައު ސިސްޓަމެއް ގަންނަން ނުޖެހި ޚަރަދު ކުޑަވެގެންދެއެވެ.
މި ޓެކްނޮލޮޖީން ހަމައެކަނި ފެތި ދުރުމިނާއި ދުވެލި ބެލުމުގެ ބަދަލުގައި، ފެތުމުގެ ފަންނީ ހުނަރުތައް ތަހުލީލުކޮށްދެއެވެ. އެގޮތުން ބޮލުގެ ޕޮޒިޝަން، ނޭވާލާ އެންގަލް އަދި ޓައިމިން، ކޮންމެ ސްޓްރޯކަކަށް ދެވޭ ދުރުމިން، އަދި އަނބުރާލާ ވަގުތުތަކުގެ އެންގަލް ފަދަ ނާޒުކު ތަފްސީލުތައް ރެކޯޑުކުރެއެވެ. މީގެ އިތުރުން ފްރީސްޓައިލް، ބެކްސްޓްރޯކް، ބްރެސްޓްސްޓްރޯކް އަދި ބަޓަރފްލައި ހިމެނޭހެން ފެތުމުގެ މައިގަނޑު ހަތަރު ސްޓައިލް ވެސް މި ސިސްޓަމުން އެނަލައިޒް ކުރެވެއެވެ.
ލޮލުގެ ކުރިމަތީގައި ސްކްރީނެއް ނެތީ ކީއްވެ؟
ސްޕީޑޯ އައިކިއުގެ އެންމެ ފާހަގަކޮށްލެވޭ ސިފައަކީ ގޮގްލްސްގައި އެއްވެސް ޑިޖިޓަލް ސްކްރީނެއް ނެތުމެވެ. މާކެޓުގައި ހުރި ބައެއް އެހެން ވާދަވެރި އުފެއްދުންތަކާ ޚިލާފަށް ސްޕީޑޯ އިން މިގޮތަށް ނިންމީ، ފެތުންތެރިޔާ ފެނުގެ ތެރޭގައި ހުންނައިރު ލޮލުގެ ކުރިމައްޗަށް އަރާ މަޢުލޫމާތުތަކުގެ ސަބަބުން ސަމާލުކަން ގެއްލުނަނުދީ، އަމިއްލަ ހަރަކާތްތަކަށް ފުރިހަމައަށް ފޯކަސް ކުރުމުގެ ފުރުސަތު ދިނުމަށެވެ. ކުޅިވަރުގެ ޚަބަރުތައް ގެނެސްދޭ “220 ޓްރައިއެތުލޮން” މަޖައްލާއިން ފާހަގަކޮށްފައިވާ ގޮތުގައި، ސްޕީޑޯ އިން އިސްކަންދީފައިވަނީ ވަގުތުން މައުލޫމާތު ދެއްކުމުގެ ބަދަލުގައި، ފެތުމަށްފަހު ފުންކޮށް ދިރާސާކުރެވޭނެ (ޕޯސްޓް-ސްވިމް އެނަލިސިސް) ނިޒާމަކަށެވެ.
ޑޭޓާއިން ފެށިގެން ތަމްރީނު ލަފާތަކާ ހަމައަށް
ފެތުން ނިންމާލުމަށްފަހު އެޕްލިކޭޝަނާ ޑޭޓާ ސިންކް ކުރުމުން، އެތުލީޓުގެ ކުރިއެރުން ވަޒަންކޮށްދީ، ހުރި ބަލިކަށިކަންކަން ރަނގަޅުކުރުމަށް ބޭނުންވާ ޚާއްޞަ ޓްރެއިނިންގ އިރުޝާދުތައް އެޕުން ފޯރުކޮށްދެއެވެ. މީގެ ސަބަބުން ހަމައެކަނި ވަގުތާއި ދުރުމިން އެނގުމުގެ ބަދަލުގައި، ޓެކްނިކަލީ ރަނގަޅުކުރަންވީ ކަންކަން ދެނެގަތުމަށް މަގުފަހިވެއެވެ.
މި އައިނަކީ ހަމައެކަނި އާދައިގެ ތަމްރީނުތަކަށް ބޭނުންކުރާ އެއްޗެއް ނޫނެވެ. ވޯލްޑް އެކުއަޓިކްސް ފެޑެރޭޝަނުން ވަނީ ރަސްމީ މުބާރާތްތަކުގައި ވެސް މި ގޮގްލްސް ބޭނުންކުރުމުގެ ހުއްދަ ދީފައެވެ. މިއީ ޕްރޮފެޝަނަލް އެތުލީޓުންނަށާއި އަމިއްލަ ފިޓްނަސް ރަނގަޅުކުރަން ބޭނުންވާ އާންމު ފެތުންތެރިންނަށް ވެސް ލިބިގެންދިޔަ ބޮޑު ފަސޭހައެކެވެ.
އެމެރިކާގެ ބާޒާރުގައި 189 ޑޮލަރަށް މިހާރު ވިއްކަން ފަށާފައިވާ މި ސްމާޓް ގޮގްލްސްގެ ޑޭޓާ ބޭނުންކުރުމަށް އެއްވެސް މަހުފީއެއް (ސަބްސްކްރިޕްޝަނެއް) ދައްކާކަށް ނުޖެހެއެވެ. ޓެކްނޮލޮޖީ ކިތަންމެ ކުރިއަރައި ދިޔަ ނަމަވެސް، މިއީ އިންސާނީ ކޯޗެއްގެ ބަދަލުގައި ބޭނުންކުރާ އެއްޗެއް ނޫން ކަމަށާއި، މިއީ ފެނުގެ ތެރޭގައި އެތުލީޓުގެ ހަރަކާތްތައް ޑިޖިޓަލައިޒްކޮށް، ކޯޗުންނާއި އެތުލީޓުންނަށް ޕާފޯމަންސް ރަނގަޅުކުރުމަށް އެހީތެރިވެދޭނެ ވަރުގަދަ ވަސީލަތެއް ކަމަށް ސްޕީޑޯ އިން ބުނެއެ
Leave a Reply