ދުވާފަރުގެ ހަމަހިމޭން ގޮނޑުދޮށުގައި އިށީނދެލައިގެން އިންއިރު، ވަށައިގެންވަނީ މަޑުމައިތިރި ރާޅުތަކުގެ އަޑެވެ. ހަވީރުގެ ފިނި ރޯޅިތައް ޖެހެމުންދިޔަ ނަމަވެސް، އަހަރެންގެ ހިޔާލުތަކުގައި އެނބުރެމުން ދަނީ އަހަރެންގެ ހިތް އެދޭ ޒުވާނާއާ މެދުގައެވެ.
އޭނާއަކީ މުޅި ރާއްޖެއަށް މަގުބޫލު، އެތައް ބައެއްގެ ލޯބި ހޯދާފައިވާ ހުނަރުވެރި ލަވަކިޔުންތެރިއެކެވެ. އެކަމަކު އަހަންނަށް އޭނާއަކީ ހަމައެކަނި ފަންނާނެއް ނޫނެވެ؛ އަހަރެންގެ ހިތުގައި ރަސްކަން ކުރަމުން އަންނަ ހަމައެކަނި ޒުވާނާއެވެ. ކޮންމެ ދުވަހަކު ވެސް އަހަރެން އޭނާގެ ފޮޓޯއެއް ފޯނުގެ ސްކްރީނުން ބަލަން އިނދެ، އެ ފޮޓޯއާ ވާހަކަ ދައްކަމެވެ. ހިތުގެ އުދާސްތައް ބޭރުކޮށްލަމުން ބުނެވެއެވެ. “އޭ ޒުވާނާއެވެ! ދެން އަހަރެންގެ ހަޔާތަށް ތިބާ އަންނާނީ ކޮން ދުވަހަކުން ހެއްޔެވެ؟ އޭ ޒުވާނާއެވެ! ތިޔަ ހިޔާލުތަކެއް އަހަންނަކަށް ދުވަހަކުވެސް ފިލުވައެއް ނުލެވޭނެއެވެ. އޭ ޒުވާނާއެވެ! ތިޔައީ މި ހިތުގެ ރަސްގެފާނެވެ. އޭ ޒުވާނާއެވެ! މި ހިތް އެދި ގޮވަނީ ހަމައެކަނި ތިޔަ ލޯތްބަށެވެ.
ތިބާ ދުށް ފަހުން މި ހިތަކަށް އެއްވެސް އަރާމެއް ނުލިބެއެވެ. ކޮންމެ ދުވަހަކު މި ފޮޓޯއަށް ހިތްފުރެންދެން ބަލައިނުލާ އަހަންނަކަށް ހިތްހަމަޖެހުމެއް، އަރާމެއް ނުލިބެއެވެ. އުއްމީދަކީ ކޮންމެވެސް އެއް ދުވަހަކުން މި ހުވަފެންތަކުގައި ހަގީގީ ކުލަޖެހި، އެ ޒުވާނާ އަހަރެންގެ ހަޔާތަށް އައުމެވެ. މިހެން އެތައް ފޮނި ވާހަކައެއް އެ ފޮޓޯއާ ދައްކައި، ހިތުގެ ކެކުޅުންތައް ބޭރުކުރުމަށްފަހު، އަހަރެން ގެއަށް ދަނީ އިރުއޮއްސި އަނދިރިވުމުންނެވެ. ކޮންމެ ދުވަހެއްގެ އާދައަކީ ވެސް މިއީއެވެ.
މިހެން ދުވަސްތައް ފާއިތުވަމުން ދިޔަ ވަރަކަށް، އެ ޒުވާނާއަށްޓަކައި އަހަރެންގެ ހިތުގައި އޮތް ލޯބި ދިޔައީ އިތުރަށް ފުންވަމުންނެވެ. އެހެން ދުވަސްތަކެކޭ ވެސް އެއްފަދައިން، އެއް ދުވަހަކު ހަވީރުގެ ހިތްގައިމު ވަގުތުގައި އަހަރެން އެ ގޮނޑުދޮށުގައި އިންދާ، ކުއްލިއަކަށް އަހަރެންގެ ކުރިމައްޗަށް އެ ޒުވާނާ އެރިއެވެ. ހަމަ އެ ލަވަކިޔުންތެރިޔާއެވެ. އެ ރީތި ސޫރައެވެ. އަހަރެން ދިޔައީ ސިއްސައިގެންނެވެ. ލޮލަށް ފެންނަ މަންޒަރު ގަބޫލުކުރަން ވެސް ދަތިވިއެވެ. ހިތުގެ ތެޅުން އަވަސްވެ، ބުނާނެ އެއްޗެއް ވެސް ނޭނގިފައި ހުރެވުނެވެ. އެ ޒުވާނާ ހިނިތުންވެލަމުން އަހަންނާ ވާހަކަ ދެއްކިއެވެ. އަދި އޭނާ އެ ރަށަށް އައިސްގެން އެ އުޅެނީ ޝޯއެއް ދިނުމަށް ކަމުގައި ބުންޏެވެ. އަހަރެމެން ދެމީހުން އެތައް އިރަކު ވާހަކަ ދައްކަން ތިބީމެވެ. އޭނާގެ މަޑުމައިތިރި މިޒާޖާއި އަޑުގެ ޖާދޫގައި އަހަރެން މުޅިން ހައްޔަރުވިއެވެ.
ނަމަވެސް، ކަންތައް ވެގެންދިޔައީ އެއްވެސް މީހަކު ހީކުރި ގޮތަކަށް ނޫނެވެ. ދުވަސްތައް ފާއިތުވެ، ދެމީހުންގެ ގުޅުން ބަދަހިވަމުން ދިޔަ ވަރަކަށް ފަހުން އެނގުނު ބިރުވެރި އަދި ހައިރާންކުރުވަނިވި ހަގީގަތަކީ، އަހަރެންގެ ކުރިމަތީގައި އެ ހުރީ ހަގީގީ އިންސާނެއް ނޫން ކަމެވެ. އެއީ އެ މަޝްހޫރު ލަވަކިޔުންތެރިޔާގެ ސިފަ ޖެހިގެން އައިސް އުޅުނު ޖިންނިއެކެވެ. ކޮންމެ ދުވަހަކު ގޮނޑުދޮށުގައި އިނދެ އަހަރެން ކުރި އާދޭސްތަކާއި، ކީ ޅެންތަކުގެ އަޑުއަހަން ހުރެ، އަހަރެންގެ މަޢުޞޫމު ލޯތްބަށް ހިތްކިޔައިގެން އިންސާނީ ސޫރައިގައި ފާޅުވީއެވެ.
އެހެން ނަމަވެސް، އެ ހަގީގަތް އެނގުނު އިރު މާ ލަސްވެއްޖެއެވެ. އެ ދެމެދުގައި ވަނީ އިންތިހާއަށް ވަރުގަދަ ލޯތްބެއް އުފެދިފައެވެ. ދެމީހުން ވެސް ތިބީ އެކަކު އަނެކަކު ދެކެ އިންތިހާއަށް ލޯބިވެވި، ވަކިވާން ނޭދޭ ހިސާބުގައެވެ. ދެ ދުނިޔެއެއްގެ ދެ މަޚްލޫގުންގެ ދެމެދުގައި އުފެދުނު މި އަޖައިބުކުރުވަނިވި ލޯބީގެ ދަތުރު ވެގެންދިޔައީ ހިތާމައާއި، ބިރުވެރިކަމާއި، އަދި އެހާމެ ފުން ލޯބި އެކުލެވިގެންވާ ތަފާތު ތަޖުރިބާއަކަށެވެ. އެއީ ތަގުދީރުގެ ނިޔާއިން ގުޅެން ނެތް، ނަމަވެސް ހިތުން ފޮހެލަން ދަތި ޢިޝްޤީ އަސަރުގަދަ ވާހަކައެކެވެ.
Leave a Reply