ދިވެހި މިއުޒިކީ ފަޒާގައި މިހާރު އެންމެ ވިދަމުން އަންނަ އެއް ތަރިއަކީ ޝަމްވީލް މުޙައްމަދު ނުވަތަ އާންމު ނަމުން ނަމަ “ބަރޯ” އެވެ. ޓީވީ ސްކްރީނުންނާއި އާންމު ދިރިއުޅުމުގައި ވެސް މޫނުމަތިން އަބަދުވެސް އުފާވެރި ހިނިތުންވުމެއް ފެންނަ ޝަމްވީލަކީ، ހިތްހެޔޮ މިޒާޖެއްގެ ވެރި ހުނަރުވެރި ފަންނާނެކެވެ.
ޝަމްވީލް އެންމެ ފުރަތަމަ ގިނަ ބައެއްގެ ސަމާލުކަމަށް އައީ ރާއްޖޭގައި ބޭއްވުނު އެންމެ ބޮޑު މިއުޒިކީ މުބާރާތް ކަމަށްވާ “މޯލްޑިވިއަން އައިޑޮލް” ސީޒަން 2 އިންނެވެ. އެ މުބާރާތުގެ ރަނަރަޕްގެ މަޤާމު އޭނާ ހޯދުމާއެކު، ވެގެންދިޔައީ ގިނަ ދިވެހިންތަކެއްގެ ލޯބި ހޯދި މަޤްބޫލު ފަންނާނަކަށެވެ.
ޝަމްވީލްގެ މިއުޒިކީ ޙަޔާތަކީ އޭނާގެ އާއިލާއާ ވަރަށް ބޮޑަށް ގުޅިފައިވާ ކަމެކެވެ. އޭނާގެ ބައްޕަގެ އިތުރުން، ބޭބެ އަދި ދިވެހި މިއުޒިކުގެ ލެޖެންޑެއް ކަމަށްވާ މޭނާ ޙައްސާންގެ ފަރާތުން ލިބުނު ހިތްވަރަކީ މި ދާއިރާއަށް ނުކުތުމަށް ލިބުނު ބޮޑު ބާރެކެވެ. އަދި ސްކޫލް ދައުރުގައި އިންޓަރ ސްކޫލް ލަވަކިޔުމުގެ މުބާރާތްތަކުން ވެސް އޭނާ ވަނީ ލަވަކިޔުމުގެ ހުނަރު އިތުރަށް ތަރައްޤީކޮށް ފައްކާކޮށްފައެވެ
ގިނަ ބަޔަކު އަބަދުވެސް އުފައްދާ ސުވާލަކީ ޝަމްވީލަށް “ބަރޯ” ކިޔުނު ގޮތަކާ މެދުގައެވެ. މި ނަމަކީ ވަރަށް މަޖާ ގޮތަކަށް އޭނާއަށް ކިޔުނު ނަމެކެވެ. ޝަމްވީލްގެ ނަމުގެ ފަހަތަށް “ވީލް” (Wheel) އަންނާތީ، ރައްޓެހިން ސަމާސާއަކަށް “ވީލްބަރޯ” އާ ގުޅުވައިގެން ކިޔަން ފެށި “ބަރޯ” މިހާރު ވަނީ އޭނާގެ ރަސްމީ އަދި މަޤްބޫލު ލަޤަބަކަށް ވެފައެވެ.
މިއަދުވެސް ޝަމްވީލް އަންނަނީ މިއުޒިކީ ދާއިރާގައި ގިނަ މަސައްކަތްތަކެއް ކުރަމުންނެވެ. އެގޮތުން އޭނާގެ އެންމެ ފަހުގެ އުފެއްދުމެއްގެ ގޮތުގައި “ލަވް މަޝްއަޕް 8” މިހާރު ވަނީ އާންމުންނަށް ދޫކޮށްލާފައެވެ. މީގެއިތުރުން، އަންނަ މަހު ވެސް މުޅިން އައު ލަވައެއް އަޑުއަހުންތެރިންނާ ހަމައަށް ގެނެސްދޭނެ ކަމަށް އޭނާ ވަނީ ބުނެފައެވެ.
މިއުޒިކީ ދާއިރާއަށް ނުކުންނަން ބޭނުންވާ ޒުވާނުންނަށް ޝަމްވީލް ދޭ ނަޞޭޙަތަކީ އަމިއްލައަށް މަސައްކަތް ކުރުމެވެ. މިޒަމާނުގައި ސޯޝަލް މީޑިއާ، ޚާއްޞަކޮށް ޓިކްޓޮކް ފަދަ ޕްލެޓްފޯމްތައް މެދުވެރިކޮށް އަމިއްލަ ހުނަރު ދައްކާލައި، ކުރިއަށް ދިއުމަށް އޭނާ ބާރުއަޅައެވެ.
ފަންނާނެއްގެ އެންމެ ބޮޑު ހިތްވަރަކީ އޭނާގެ ފޭނުން ކަމުގައި ދެކޭ ޝަމްވީލް ވަނީ، އޭނާއަށް ސަޕޯޓަރުންގެ ފަރާތުން ލިބޭ ލޯތްބާއި ސަޕޯޓަށްޓަކައި ހިތުގެ އަޑިން ޝުކުރު އަދާކޮށް، ކުރިއަށް އޮތް ތަނުގައި ވެސް އެ އެއްބާރުލުން ދިނުމަށް އެދިފައެވެ. ޝައްކެއްނެތް ގޮތުގައި، ޝަމްވީލް (ބަރޯ) އަކީ ދިވެހި ލަވަކިޔުންތެރިކަމުގެ އުދަރެހުގައި އަދިވެސް އުޖާލާކަމާއެކު ވިދަމުންދާނެ އަގުހުރި ފަންނާނެކެވެ.
Leave a Reply