އުއްމީދީ ޒުވާން ލަވަކިޔުންތެރިޔާ ޝިޔާންއާއެކު

މިއަދުގެ ޒުވާނުންގެ މެދުގައި އެންމެ މަޤްބޫލު އެއް ފަރާތް ކަމުގައިވާ ޓިކްޓޮކް މެދުވެރިކޮށް، ގިނަ ބައެއްގެ ސަމާލުކަން ހޯދަމުން އަންނަ ޝިޔާންއަކީ އުމުރުން ކިތަންމެ ހަގު ނަމަވެސް، ހުނަރުވެރިކަން ސާބިތުކޮށްދެމުން އަންނަ އުއްމީދީ ލަވަކިޔުންތެރިއެކެވެ. ލަވަކިޔުމުގެ އިތުރުން ގިޓާ ކުޅުމުގެ ހުނަރުވެސް ތަރައްޤީކުރަމުން އަންނަ ޝިޔާންގެ ހިތުގައި މިއުޒިކަށް އޮތް ލޯތްބާއި ޝައުޤުވެރިކަން އޭނާގެ ހުށަހެޅުންތަކުން ވަރަށް ބޮޑަށް ފެނިގެންދެއެވެ. ޝައްކެއްވެސް ނެތް ގޮތުގައި، ޝިޔާންއަކީ ދިވެހި މިއުޒިކީ ދާއިރާގެ ކުރިމަގުން ފިޔަޖަހާނެ ތަރިއެކެވެ. މި މަޒުމޫނުގައި މި ހިމަނާލަނީ ޝިޔާންއާއެކު ކޮށްލެވުނު ކުރު އިންޓަވިއުއެއްގެ މުހިންމު ވާހަކަތަކެވެ.
1. ލަވަކިޔަން ފެށުނީ ކޮން އުމުރެއްގައި؟ޝިޔާން މިއުޒިކީ ދުނިޔެއަށް ފިޔަވަޅު އަޅައި، ލަވަކިޔަން ފަށާފައިވަނީ އޭނާގެ އުމުރުން އެންމެ 9 ނުވަތަ 10 އަހަރުގައެވެ. ވަރަށް ޅަފަތުގައި ފެށުނު މި ޝައުޤުވެރިކަން މިއަދު މިވަނީ ވަރުގަދަ ހުނަރަކަށް ބަދަލުވާން ފަށާފައެވެ.
2. ގިޓާ ކުޅެން ދަސްކުރަން ކިހާ ދުވަހެއް ނެގި؟ގިޓާ ކުޅުމުގެ އަސާސީ ބައިތައް ދަސްކުރުމަށް އޭނާއަށް ގާތްގަނޑަކަށް ދެ އަހަރު ދުވަސް ނެގި ކަމަށް ޝިޔާން ފާހަގަކުރިއެވެ. އަދި އޭގެ އިތުރަށް، މި ހުނަރުގެ އެންމެ މަތީ ފެންވަރަށް ވާސިލުވުމަށްޓަކައި ވޭތުވެދިޔަ ފަސް އަހަރު ދުވަހުވެސް އޭނާ ވަނީ މެދުކެނޑުމެއްނެތި މަސައްކަތްކޮށްފައެވެ.
3. އެންމެ ގަޔާވާ ލަވަކިޔުންތެރިޔަކީ ކާކު؟ދިވެހި ފަންނާނުންގެ ތެރެއިން ޝިޔާން އެންމެ ޤަދަރުކުރާ އަދި އޭނާގެ އެންމެ ފޭވަރިޓް ލަވަކިޔުންތެރިޔަކީ ނަސޫޙް އެވެ.
4. އެންމެ ކަމުދާ ތިން ލަވަޔަކީ ކޮބާ؟ޝިޔާން އެންމެ އަޑުއަހާ ހިތްވާ އަދި ގަޔާވާ ލަވަތަކުގެ ތެރޭގައި “ބަދަލު މީ ވީތީ ޕަރީ”، “ނުކުރޭ ޒަޚަމް” އަދި “ލޯބިކަން އަސްލު އާންމުކޮށް އަޑުއަހާ އުޅެނީ” ހިމެނެއެވެ. މީގެއިތުރުން ހިންދީ ލަވަތައް އަޑުއެހުމަކީވެސް އޭނާ ވަރަށް ކުރާހިތްވާ ކަމެކެވެ.
5. ސަޕޯޓަރުންނަށް ބުނެލަން ބޭނުންވަނީ ކީކޭ؟އޭނާއަށް ލިބެމުންދާ ތަރުޙީބާއި ސަޕޯޓަށްޓަކައި ޝިޔާން ވަނީ ހުރިހާ ސަޕޯޓަރުންނަށް ވަރަށް އިޚްލާޞްތެރިކަމާއެކު ޝުކުރު އަދާކޮށްފައެވެ. އޭނާ ބުނީ، “ތިޔަ ހުރިހާ ފަރާތްތަކުން ދެއްވާ އެއްބާރުލުމާއި ހިތްވަރަށް ވަރަށް ބޮޑަށް ޝުކުރިއްޔާ!” މިހެންނެވެ.
ޝިޔާންގެ މި ދަތުރަކީ އަދި ފެށުމެކެވެ. އޭނާގެ ހުނަރު ފުރިހަމަކޮށް، ކުރިމަގުގައި ކާމިޔާބު ފަންނާނެއްގެ ގޮތުގައި މިއުޒިކީ އުދަރެހުން ފެނިގެންދާނެ ދުވަހަކަށް ގިނަ ބަޔަކު އިންތިޒާރު ކުރާނެކަން ޔަޤީނެވެ.

ހަސަން އަރީން ( އެޑީ )