އިބްރާހީމް ޙަސަން
ދިވެހިން މިހާރު ބަލައިގެންފައިވާ ޑިމޮކްރަސީގެ ސަބަބުން ކޮންމެ 5އަހަރަކުން އައު ސަރުކާރެއް އައުމަކީ ކޮންމެހެން ލާޒިމް ކަމެއް ކަމަކަށް ވެއްޖެއެވެ. ރައީސް މައުމޫންގެ ދިގު ވެރިކަން ނިމި، ރައީސް ނަޝީދު ހެޔޮވެރިކަމެއްގެ ފެށުން ކަމަށް ވިދާޅުވެ އެމަނިކުފާނު ފެއްޓެވި ފަނޑިޔާރުން މައިތިރި ކުރެއްވުމުގެ މަސައްކަތުގެ ތެރޭގައި ހެއްދެވުނު ގޯސްތަކުގެ ސަބަބުން ދިވެހިން ބަލައިގެން ޑިމޮކްރަސީގެ ފުރަތަމަ ވެރިކަން ވެއްޓިގެން ދިޔައީ ދައުރެއް ފުރިހަމަ ވާން ކައިރިވެސް ނުވަނީހެވެ. ރައީސް ނަޝީދު ވެރިކަމުން އިސްތިއުފާ ދެއްވުމާއި އެކު އެމަނިކުފާނުގެ ނާއިބެއްގެ ގޮތުގައި ހުންނެވި ޑރ ވަހީދު ވެރިކަމާ ޙަވާލުވިއެވެ. ރައީސް ވަޙީދު ކުރެއްވި ކުރު ވެރިކަމުން ރައްޔިތުންގެ ކުޑަވެސް ތާއިދެއް ލިބުމެއް ނެތި، ރައީސް ވަހީދުގެ ވެރިކަން ނިމުމުގެ ސިއްކަ ޖެހުނުތައް ފެނުނެވެ. ދެން ފެށުނީ ރައީސް ޔާމީންގެ ވެރިކަމެވެ. އެމަނިކުފާނުގެ ވެރިކަމަކީ ފަހުގެ ތާރީޚެއްގައި އެންމެ ބޮޑެތި ޚިޔާނާތާއި ކޮރަޕްޝަންގެ ވާހަކަ އަޑު އިވިގެން ދިޔަ ވެރިކަމެކޭ ބުނެވި ދާނެއެވެ. “ބުރޯ” ގެ ކިބައިން ސަލާމަތް ނުވެވި އުޅެނިކޮށް ރައީސް ޔާމީންގެ ވެރިކަން ގެއްލި، ރައީސް އިބްރާހީމް މުޙަންމަދު ސާލީހްގެ ވެރިކަން ފެށުނެވެ. ކޮވިޑްގެ އާލަމީ ވަބާ ރާއްޖޭ ސަލާމަތް ކުރުމުގެ މަސައްކަތާއި އެކު ސާލިހް ސަރުކާރަށް ޖެހުނު އެންމެ ބޮޑު ލައްގަޑަކީ “ނޭވާ ހޮޅިން” ކުރި ވައްކަން ފަޅާ އެރުމެވެ. އަދި ރައީސް ޞާލީހްގެ ވެރިކަމުގައި ތެރޭގައި ކުޅުއްވި “އަލަންގިރި” އާއި “މާގިރި” ގެ ފިލްމާއި އެކު ދިވެހިން ދަތުރު ދާން މާލެ ކައިރީގައި ކުޑަރަށެއް ތަރައްޤީކޮށް އެރަށުގެ ނަމަކީ ކުޑަގިރި ކަމަށް ކަނޑައެޅުވި އެވެ. ސާލިޙްގެ ސަރުކާރު ގިރިތަކަށް އަރާ ނިމިގެން ދިޔައީ އެމަނިކުފާނުގެ ބެސްޓް ފްރެންޑްގެ ސަބަބުން ކަމަށް ވެސް ވެދާނެއެވެ. މިހާރު މިދަނީ ދިވެހިންނަށް ދިވެހިންގެ ރާއްޖެ ހޯއްދަވައި ދިނުމުގެ ރައީސް މުއިއްޒު ގެ ވެރިކަމެވެ.
އަޅުގަނޑު ކުރިން މިދެންނެވީ މިފަހަކަށް އައިސް އުފެދުނު ސަރުކާރު ތަކުގެ ކުޑަވަރެއްގެ ތަސްވީރެކެވެ. މިއިން ކޮންމެ ވެރިކަމަކީވެސް ސިޔާސީ ޕާޓީތަކުގެ ތެރެއިން އުފެދިގެން އައި ސަރުކާރު ތަކެކެވެ. ކޮންމެ ސަރުކާރެއް ވެސް އުފެދުމާއި އެކު އެސަރުކާރަށް ނިސްބަތްވާ ބޭފުޅުންގެ މައިގަނޑު މަސައްކަތަކީ ކޮންމެ ގޯހެއް އެއީ ކުރީ ސަރުކާރުގެ ބޮލުގައި އެޅުވުމެވެ. ރަގަޅު ކަމެއްވިއްޔާ މިސަރުކާރުގެ ކަމަކަށް ހައްދާ ރައްޔިތުންނަށް ވިއްކޭތޯ ބެލުމެވެ. ކުރީ ސަރުކާރުން ކިތަންމެ ރަގަޅު ކަމެއް ކޮށްފައި އޮތްނަމަވެސް އެކަމެއް ބިމާ ހަމަކުރުމަކީ މިސަރުކާރުން ކުރަން ޖެހޭ ކަމެއް ކަމަށް މިހާރު މިވަނީ ހަދާފައެވެ. ކުރީ ސަރުކާރުން ތަނަކަށް ކިޔާ ނަމެއް ވިޔަސް މިސަރުކާރުން ޖެހޭނީ އެތަނަކަށް ކިޔާ ނަން ބަދަލު ކުރާށެވެ. އަދި މިހާރު މިވަނީ ދަރިވަރުންގެ އަހަރީ ބޮޑު ޗުއްޓީ ދެސަރުކާރުން ކުޅޭ ކުޅިވަރަކަށް ހަދާފައެވެ.
މިހާރު ދިވެހިންނަށް ކުރީ ސަރުކާރު! މިސަރުކާރު! އަކީ އައު ވާހަކަ އަކަށް ނުވާނެއެވެ. ގައުމުގެ އިޤްތިޞާދު ބަގުރޫޓްވެ ކުދި ވިޔަފާރިތައް ފުނޑި، ވަގުންގެ ހާއްޔަކަށް ބަދަލުވެ، ރައްޔިތު މީހާގެ އަތުގައި ހުރި ފައިސާ ފޮތި ހުސްވެ ހަދާނެ ގޮތެއް ނެތިގެން “މަރަށް” ތެޅޭ އިރުވެސް އެސަރުކާރު މިސަރުކާރު ކޮންސަރުކާރު ކިޔަކިޔާ ތިބެން ވީބާއެވެ.
Leave a Reply