އޮލިމްޕިކް ފުޓުބޯޅަ: ސްޕެއިން ފައިނަލަށް ދަތުރުކޮށްފި

ޕެރިސް އޮލިމްޕިކްސްގެ ފިރިހެނުންގެ ފުޓުބޯޅަ މުބާރާތުގެ ސެމީ ފައިނަލްގައި މޮރޮކޯ 2-1 އިން ބަލިކޮށް، ސްޕެއިން ވަނީ ފައިނަލަށް ދަތުރުކޮށްފައެވެ.

ރޭ ކުޅުނު މި މެޗުގައި، ފުރަތަމަ ލަނޑު ޖެހީ މޮރޮކޯއިންނެވެ. މެޗުގެ 37 ވަނަ މިނެޓުގައި ލިބުނު ޕެނަލްޓީއަކުން މި ލަނޑު ޖެހީ މުބާރާތުގައި އެންމެ ގިނަ ލަނޑު ޖަހާފައިވާ ސޮފްޔާން ރަހީމީއެވެ.

ނަމަވެސް ދެވަނަ ހާފުގެ 65 ވަނަ މިނެޓުގައި ބާސެލޯނާގެ ޒުވާން މިޑްފީލްޑަރު ފާމިން ލޮޕޭޒް ވަނީ ސްޕެއިނަށް އެއްވަރުކޮށްދީފައެވެ. އަދި މޭޗުގެ ފަހު މިނެޓުތަކުގައި ސަންޗޭޒް ވަނީ ސްޕެއިނަށް ކުރިއެރުން ހޯދައިދީފައެވެ. މި ލަނޑަށް އެސިސްޓް ކޮށްދިނީ ވެސް ފާމިންއެވެ.

މި މެޗުގައި އިތުރު ކަމެއްގެ ގޮތުގައި، މެޗު ފެށިގެން މާގިނައިރުތަކެއް ނުވަނީސް އިސް ރެފްރީ އާއި ސްޕެއިންގެ ކުޅުންތެރިޔަކު ޖެހި، ރެފްރީއަށް އަނިޔާވުމުގެ ސަބަބުން ދަނޑުން ފައިބަން ޖެހުނެވެ. މިކަމާ ގުޅިގެން މެޗުގެ ބާކީ ވަގުތުތަކުގައި ރެފްރީކަން ކުރީ ހަތަރުވަނަ އޮފިޝަލެވެ.

ސްޕެއިންގެ ޓީމުތަކުން ވަނީ އެންމެ ފަހުގެ ފިރިހެނުންގެ ޔޫރޯ އާއި އަންހެނުންގެ ވޯލްޑް ކަޕް ވެސް ކާމިޔާބުކޮށްފައެވެ. އަދި މިހާރު އޮލިމްޕިކްސްގެ ފިރިހެނުންގެ ފުޓުބޯޅަ އިވެންޓްގެ ރަން މެޑަލް ހޯދުމަށް ސްޕެއިން އިން ނުކުންނާނީ ގޭމްސް ބާއްވާ ގައުމު ކަމަށްވާ ފްރާންސާ ދެކޮޅަށެވެ.

ޝިނާ