ބަނގުލަދޭޝްގެ ބޮޑު ވަޒީރު ޝައިޚް ޙަސީނާ އިސްތިއުފާ ދީ ގައުމު ދޫކޮށް ފިލައިގެން ދާނެ ޖެހުނު ހާދިޘާއަކީ ވިސްނާލަން ޖެހޭ ވަރުގެ ހާދިޘާ އެކެވެ. ރައްޔިތުން ނުހަނު އިހްތިރާމާއެކު އިންތިޚާބު ކުރި ވެރި މީހާ ޤައުމު ދޫކޮށް ފިލައިގެން ދާން ޖެހުމަކީ އެހެން ޤައުމު ތަކުގައި ތިބި ވެރިންނާއި އަދި ވެރިކަމަށް އަންނަ ހިތުން “ރޭގަނޑުގެ ނިދިން މަހްރޫމް” ވަމުން ދާ ފަރާތްތަކުން ވެސް ވިސްނަން ޖެހޭނެ ކަމެކެވެ.
ބަނގުލަދޭޝްގެ ކިޔަވާކުދީން ކުރަން ފެށި ޚިޔާލު ފާޅު ކުރުމުގެ މުޒާހަރާއެއް ހޫނުވެ ޤައުމުގެ ހުރިހާ ފަންތިއެއްގެ މީހުން މަގުތަކަށް ނުކުމެ، ޝައިޚް ހަސީނާގެ ބާރުގަދަ ވެރިކަން ވައްޓާލުމުގައި ގިނަ ސަބަބު ތަކެއް ވެއެވެ. ހައިބަތު ހުރި ބަނގުލަދޭޝްގެ ރިޔާސީ ގަނޑުވަރަށް ރައްޔިތުން ވަދެ، އަގު ބޮޑު ފަރުނީޗަރ އާއި ބޮޑުވަޒީރުގެ ޒާތީ ބައެއް ތަކެތި ރައްޔިތުން ގެންދިޔައިރު، އެކަން ހުއްޓުވާނެ ފުލުހެއް ސެކިއުރިޓީ އެއްވެސް ނެތްކަމަކީ ފިކުރު ކުރާ ފަރާތްތަކުން ވިސްނާލަން ޖެހޭ ކަމެކެވެ. އެކަމަނާގެ ވެރިކަމުން ފޮނި މީރުކަން ލިބެމުން ދިޔަ ފަރާތްތަކުގެ ތެރެއިން މަދު މީހަކު ނޫނީ މިއަދު އެކަމަނާގެ ހިމާޔަތަކު ނެތެވެ. ސަރުކާރުގެ ހުރިހާ ބާރުތަކެއް އިއްޔެ އޮތީ އެކަމަނާގެ މުށުތެރޭގައެވެ. ނަމަވެސް މިއަދު ރައްޔިތުން ނުކުމެ ވެރިކަމުން ބޭރުކުރަން ބޭނުންވި ހިނދު ހަސީނާގެ މުށުތެރެއިން ހުރިހާ ބާރެއް ގެއްލި ހަމަ އެކަނި ފުރާނައިގެ ރައްކަލަކަށްޓަކައި އަވަށްޓެރި އިންޑިއާއަށް ދާން ޖެހުނީ ނިކަމެތި ކަމާއި އެކުއެވެ.
171.2މިލިއަން މީހުންގެ އާބާދީއެއް އޮންނަ ބަނގުލަދޭޝްގެ ސިޔާސީ މައިދާނުގައި އެންމެ ހިނގާ ދެނަމަކީ ޝައިޚް ހަސީނާ، ޚާލިދާ ޒިއާ އެވެ. ގިނަ މުހައްލިލުން ސިފަ ކުރައްވާ ގޮތުގައި ޝައިޚް ހަސީނާ 15އަހަރުގެ ވެރިކަމަކީ ޚުދުމުޚުތާރު ކަމާއި ކޮރަޕްޝަނާ ފަސާދާ އެކުލެވިގެންވާ ވެރި ކަމެކެވެ. އިންސާފާއި ހަމަހަމަކަން ގެއްލިފައިވާ އިންސާނީ ޙައްޤުތައް ތަޅު އަޅުވައިގެން ހިންގި ވެރި ކަމެކެވެ. ރައްޔިތުން ތަހައްމަލު ކުރަމުން ދިޔަ ވޭންތަކާއި ޒަޚަމުތަކުގެ އަސަރު މަގުތަކުން ފެނިގެން ދިޔައެވެ. ޢާއްމު ރައްޔިތުންގެ ތެރެއިން އެތައް ބަޔަކު މަރުވަމުން ދިޔައިރުވެސް ރައްޔިތުން ބިރެއްނެތި ކުރަމުން ދިޔަ މުޒާހާރާ ހުއްޓުވޭނެ އެއްވެސް ގޮތެއް ހަސީނާއަކަށް ނުފެނުނެވެ. ބޮޑު ބަޑީގެ އުންޑައަކަށް ރައްޔިތުން މައިތިރި އެއް ނުކުރެވުނެވެ.
މިއީ ދުނިޔޭގެ ކޮންމެ ޤައުމެއްގައިވެސް ޚާއްޞަކޮށް ދެކުނު އޭޝިޔާގެ ކޮންމެ ޤައުމެއްގައި ވެސް ހިނގާފާނެ ކަންކަމެވެ. ރައްޔިތުންގެ ދިރިއުޅެން ދަތިވެ އާމްދަނީ ދަށްވެ ޤައުމުގައި ކުށާ ފަސާދަ އިތުރުވެ އިންސާފާއި ހަމަހަމަކަން ގެއްލި ވެރިކަމުގައި ބަގުޑި ބައްދަން އުޅޭ ހަމަ ކޮންމެ ވެރިކަމަކަށް މިހިތި މަންޒަރާ ކުރިމަތި ލާން ޖެހޭނެއެވެ. ރައްޔިތުންނަށް ލިބޭ އާމްދަނީ ދަށްވެ ރައްޔިތުން ފަޤީރު ވެ ބަނޑުހައި ހޫނު ކަމާއި ދިރިއުޅުމުގެ ޙާލަތު ދަށްވެގެން ދާނަމަ މިއަދު އޮތް ލޯބި ނަފްރަތަށް ބަދަލު ވެގެން ދިއުމަށް، ކުޑަ ވަގުތު ކޮޅެއްވެސް ނުނަގާނެއެވެ. އަބަދުވެސް ކޮންމެ ވެރިޔަކުވެސް ހަދާން ކުރަންވީ، ވެރިކަން ފެށިގެން އަންނަނީ އަދި ވެރިކަން ދެމި އޮންނަނީ ރައްޔިތުންގެ ކިބައިގާ ކަމެވެ.
Leave a Reply