ގާނޫނުއަސާސީގައި ބަޔާންކޮށްފައިވާ ހައްގުތައް ކަށަވަރުކޮށްދީ، ދައުލަތުގެ މުއައްސަސާތައް ޖަވާބުދާރީ ކުރުވުމަށް މަޖިލީހުން ދެމިތިބޭނެ ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުالله މިއަދު ވިދާޅުވެއްޖެ އެވެ.
މަޖިލީހުގެ ރައީސް މިހެން ވިދާޅުވީ ރާއްޖޭގެ މިހާރުގެ ގާނޫނު އަސާސީ ތަސްދީގުކުރިތާ މިއަދު 16 އަހަރު ފުރުމާ ގުޅިގެންނެވެ.
މާމިގިލީ ދާއިރާގެ މެމްބަރު ޤާސިމް އިބްރާހީމް ހުންނެވީ މިހާރު އޮތް ޤާނޫނުއަސާސީ އެކުލަވައިލުމުގެ މަސައްކަތް ކުރެއްވި ޚާއްޞަ މަޖިލީހުގެ ރައީސްގެ މަޤާމުގައެވެ. ހާއްސަ މަޖިލީހުގެ މެންބަރުންގެ ތެރޭގައި މަޖިލީހުގެ މިހާރުގެ ނައިބު ރައީސް އަހުމަދު ނާޒިމް ވެސް ހިމެނިވަޑައިގަންނަވަ އެވެ.
މަޖިލީހުގެ ރައީސް އަބްދުއްރަހީމް ވަނީ ގާސިމާއި ހާއްސަ މަޖިލީހުގެ އެހެން މެންބަރުން ނަށް ޝުކުރު އަދާކުރައްވައި، މިހާރު އޮތް ގާނޫނު އަސާސީ އެކުލަވައިލުމުގައި ޤާސިމާއި އެހެނިހެން މެންބަރުން ކޮށްދެއްވާފައިވާ މަސައްކަތްތައް ފާހަގަކުރައްވާފައެވެ.
މިހާރުގެ ގާނޫނު އަސާސީ އަކީ 2004 ވަނަ އަހަރު އޭރުގެ ރައީސް މައުމޫން އަބްދުލްގައްޔޫމް އިއުލާނު ކުރެއްވި އިސްލާހީ އެޖެންޑާގެ ދަށުން އެކުލަވާލި ގާނޫނުއަސާސީއެކެވެ. އެ އެޖެންޑާގެ ދަށުން ގާނޫނު އަސާސީ އަށް ބަދަލު ގެނެސް، މިހާރު އޭގެ ތެރޭގައި ބާރުތައް ވަކިކުރުމާއި، ޑިމޮކްރެޓިކް ގިނަ ހައްގުތަކެއް ކަށަވަރުކޮށްދިނުމާއި، އެނޫންވެސް އެތައް ބަދަލުތަކެއް ހިމެނެ އެވެ.
Leave a Reply