ވިނަރެސް ފްލެޓްތަކުގެ އެކްސެސް ކޮންޓްރޯލް ސިސްޓަމް މަރާމާތު ކުރުމުގެ މަސައްކަތް ކުރަމުން އަންނަ ކަމަށާއި އަންނަ ހަފުތާގައި އަލުން ހިދުމަތް ދޭން ފަށާނެ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފި އެވެ.
އެޗްޑީސީން މިއަދު ކުރި އިއުލާނެއްގައި ބުނެފައި ވަނީ ހަލާކުވެފައިވާ އެކްސެސް ކޮންޓްރޯލް ސިސްޓަމާއި ދޮރުތައް މަރާމާތުކޮށް އަންނަ ހަފުތާގެ އާދީއްތަ ދުވަހުގެ ކުރިން ބޭނުން ކުރަން ތައްޔާރުކުރާނެ ކަމަށެވެ. ވިނަރެސް 10 ގެ މެނޭޖްމަންޓް އޮފީހުން ވީހާވެސް އަވަހަކަށް އެކްސެސް ޓެގް ނެގުމަށް ވަނީ އިލްތިމާސްކޮށްފަ އެވެ.
އެޗްޑީސީން ބުނީ އެކްސެސް ކޮންޓްރޯލް ސިސްޓަމް ބަހައްޓާފައިވަނީ އިމާރާތުގައި ދިރިއުޅޭ ފަރާތްތަކުގެ ސަލާމަތާއި ރައްކާތެރިކަން ކަށަވަރު ކުރުމަށް ކަމަށާއި އެ ސިސްޓަމަށް ގެއްލުން ދިނުމަކީ ބޭނުންކުރާ ހުރިހާ ފަރާތްތަކުގެ ހައްގުތަކަށް އުނިކަން ލިބޭ ކަމެއް ކަމަށެވެ. އެހެންކަމުން ނިޒާމަށް ގެއްލުންދޭ ފަރާތްތަކާ މެދު ފިޔަވަޅު އަޅާނެ ކަމަށެވެ.
ވިނަރެސް ޓަވަރުތަކުގެ ތިރީ ދޮރުތަކުގައި އެކްސެސް ކޮންޓްރޯލް ސިސްޓަމް ހަރުކޮށް، ޓެގު ޖަހައިގެން ވަދެވޭ ގޮތް ހެދީ މިދިޔަ ޖޫން ފަހުކޮޅުގަ އެވެ. އެކަމަކު، ތިން ދުވަސް ފަހުން އެ ސިސްޓަމަށް ގެއްލުން ދިނުމުން ވަގުތީ ގޮތުން ހިދުމަތް ވަނީ މެދުކެނޑިފަ އެވެ.
Leave a Reply