މާލޭ ސިޓީ ކައުންސިލުން މާފަންނު ސަހަރާގެ ގަބުރުތައް ނަގައި، އެ ބިން އެއްކޮށް ހުސްކޮށްދޭނެ ބަޔަކު ހޯދަން އިއްޔެ އިއުލާންކޮށްފި އެވެ.
އެ ކައުންސިލުން އިއްޔެ ކުރި އިއުލާނެއްގައި ވަނީ، އެ ކައުންސިލުގެ ބެލުމުގެ ދަށުގައިވާ މާފަންނު ސަހަރާ ސާފުކޮށް، އެތަން ހުސްކޮށްދިނުމުގެ މަސައްކަތް އަމިއްލަ ތަކެތީގައި ކޮށްދޭނެ ފަރާތެއް ބޭނުންވާ ކަމަށެވެ.
އެހެންވެ، އެ މަސައްކަތަށް ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާއިރު، އެ މުއްދަތު ހަމަވާނީ މި މަހުގެ 20 ވަނަ ދުވަހެވެ.
ސަހަރާ ހުސްކުރުމުގެ މަސައްކަތް ކުރަން ޖެހޭނީ އިކޮނޮމިކް މިނިސްޓްރީއާއި އެ ކައުންސިލުން ކަނޑައަޅާފައިވާ އުސޫލުތަކާއި މައުލޫމާތު ކަރުދާހުގައިވާ މިންގަނޑުތަކާ އެއްގޮތަށް ކަމަށް މާލެ ސިޓީ ކައުންސިލުން ބުނެފައިވެއެވެ.
އިތުރަށް އެ އިއުލާނުގައިވާ ގޮތުން، އެ ސަހަރާއިން ހުސްކުރަނީ 36،153 އަކަފޫޓުގެ ސަރަހައްދެކެވެ. ނަމަވެސް، އެތަން ހުސްކުރަނީ ކޮން ބޭނުމަކަށް ކަމެއް މިހާތަނަށް އެ ކައުންސިލުން ހާމަކޮށްފައެއް ނުވެއެވެ.
Leave a Reply