ބަނގުލަދޭޝްގެ ވަގުތީ ސަރުކާރުގެ އިސްވެރިޔާ މުޙަންމަދު ޔޫނުސް، އިންޑިއާގެ ބޮޑުވަޒީރު ނަރެންދްރަ މޯދީއާ ފޯނުން ގުޅުއްވާ ބަންގުލަދޭޝް ގެ މިހާރުގެ ހާލާތު ގުޅޭ ގޮތުން ޚިޔާލު ބަދަލު ކުރައްވައިފިއެވެ. މިމަޝްވަރާތަކުގެ ތެރޭގައި ބަގުލަދޭޝްއަށް ބޭނުންވާ އެހީތެރިކަން ފޯރު ކޮށްދެއްވާނެ ކަމުގެ ޔަޤީން ކަން ބޮޑުވަޒީރު މޯދީ ވަގުތީ ސަރުކާރުގެ އިސްވެރިޔާ ޔޫނުސްއަށް ދެއްވާފައި ވެއެވެ. ބޮޑުވަޒީރު މޯދީ އެކްސްގައި ލިޔުއްވާފައި ވަނީ “މިހާރު އޮތް ހާލަތާ ބެހޭގޮތުން (ޔޫނުސް އާއި) ޚިޔާލު ބަދަލުކުރެވުނު” ކަމަށެވެ. އަދި “ޑިމޮކްރެޓިކް، ސްޓޭބަލް، ސުލްޙަވެރި އަދި ތަރައްޤީވަމުންދާ ބަންގްލަދޭޝްއަކަށް އިންޑިއާގެ ތާއީދު އަލުން އޮތްކަން ހާމަކުރެވުނު. ބަންގްލަދޭޝްގައި ހިންދީންނާއި އެހެނިހެން މައިނޯރިޓީތަކުގެ ރައްކާތެރިކަމާއި، ސަލާމަތާއި، ސެކިއުރިޓީ ކަށަވަރުކޮށްދެއްވާނެ ކަމަށް ޔަޤީން ކުރާ ކަމަށް ” ވެސް މޯދީ އެކްސްގައި އިތުރަށް ލިއުއްވާފައި ވެއެވެ.
މިއީ ޔޫނުސް އޯގަސްޓް 8 ގައި ހުވާކުރެއްވުމަށްފަހު ޝެއިޚް ހަސީނާގެ ސަރުކާރު ވެއްޓުނު ފަހުން ދެ ލީޑަރުން ވާހަކަދެއްކެވި ފުރަތަމަ ފަހަރެވެ.
ޖުލައި 16 އިން ފެށިގެން ބަންގްލަދޭޝްގައި ހިނގި އިހުތިޖާޖުތަކުގައި 580 އެއްހާ މީހުން މަރުވެފައިވެއެވެ. މި އިހުތިޖާޖުތައް ފެށުނީ ސަރުކާރުގެ ވަޒީފާތަކުގެ ކޯޓާ އިސްލާހުކުރުމަށް އެދި ކިޔަވާ ކުދިން މަގުތަކަށް ނުކުމެ އަޑު އުފުލުމުގެ ތެރެއިންނެވެ. މިއިހްތިޖާޖް ނިމިގެން ދިޔައީ ހަސީނާގެ އަވާމީ ލީގު ސަރުކާރުގެ 15 އަހަރުގެ ވެރިކަން ނިމުމަކަށް އައިސްގެންނެވެ. ބޮޑުވަޒީރު ކަމުން އިސްތިޢުފާ ދެއްވުމަށްފަހު ހަސީނާ ފިއްލަވާ ވަޑައިގަތީ ނިއު ދިއްލީއަށެވެ.
Leave a Reply