އޯގަސްޓް 20 ވަނަ ދުވަހަކީ “ވޯލްޑް މޮސްކިޓޯ” ދުވަހެވެ. މި ދުވަހަކީ މަދިރިން ފެތުރޭ ބަލިތަކާއި އެ ބަލިތައް ކޮންޓްރޯލް ކުރުމަށް ކުރެވޭ މަސައްކަތްތަކާ ބެހޭގޮތުން ހޭލުންތެރިކަން އިތުރުކުރުމަށް ޚާއްޞަކުރެވިފައިވާ ދުވަހެކެވެ. މި ދުވަހަކީ 1897 ވަނަ އަހަރު ސަރ ރޮނަލްޑް ރޮސް މެލޭރިޔާ ބަލި ފެތުރުމުގައި މަދިރިއަކީ މެދުވެރިއެއްކަން ދެނެގަތް ދުވަސް ފާހަގަކުރުމަށް ކަނޑައެޅިފައިވާ ދުވަހެކެވެ. މިއީ މެލޭރިޔާ ބައްޔާ ދެކޮޅަށް ކުރެވޭ މަސައްކަތުގައި ވަރަށް މުހިންމު ހޯދުމެކެވެ.
މި އަހަރުގެ ދުނިޔޭގެ މަދިރި ދުވަހުގެ ޝިޢާރަކީ “އިންސާފުވެރި ދުނިޔެއެއް އުފެއްދުމަށް މެލޭރިޔާއާ ދެކޮޅަށް ކުރެވޭ މަސައްކަތް އަވަސްކުރުން” އެވެ. މި ޝިޢާރުގައި އަލިއަޅުވާލަނީ މެލޭރިޔާ ބަލި ރައްކާތެރިވުމާއި، ދެނެގަތުމާއި އަދި ފަރުވާ ހޯދުމުގައި ހުރި ތަފާތުތައް ނައްތާލުމުގެ މުހިންމުކަމަށެވެ. މިފަދަ ބަލިތައް ވަގުތުން ދެނެގަތުމަކީ ގިނަ ފުރާނަތަކެއް ސަލާމަތްކުރެވި، އިތުރު ނުރައްކާތަކުން ރައްކާތެރިވެވޭނެ ކަމެކެވެ.
ރާއްޖޭގައިވެސް މަދިރީގެ ސަބަބުން ޖެހޭ ބަލިތައް ބައެއް ދުވަސްވަރު ފެތުރި ފުރާނައަށް ގެއްލުން ވެފައިވާ ކަން ފާހަގަ ކުރެވެއެވެ. އަދި މަދިރި މަދުކުރުމުގެ މަސައްކަތް ރަށު ފެންވަރުގައި ބައެއް ރަށްރަށުގައި ހިންގަމުން ދާކަށް ފާހަގަ ކުރެވެއެވެ.
Leave a Reply