މޮޅު ފޯކެއް، ރަނގަޅު ދުފާ ހުންޏެއް ނުހުރެއެވެ.

އަރުޝިދު

ދުފާފޯކަކީ އެއަށް ކުކުން އެއްކޮށްގެން، ރަނުގެ ތަބަކެއްގައި ކެޔަސް ހަށިގަނޑަށް ފައިދާހުރި އެއްޗެއްކަމަކަށް ނުވާނެއެވެ. ފޯކަކީ ކެންސަރަށް މަގުފަހިކުރުވާ ތަކެތީގެ ލިސްޓުގެ ކުރީގައި ހިމެނޭ އެއްޗެކެވެ. ފޯކުން ތައްޔާރުކުރާ ސާމާނު ވަކިތަކެއްގައި ވަކިގޮތަކަށް ހަދައިގެން ކަންބޮޑުވެގެން އުޅުމަކީ ބަގޯލު ހެދުމެވެ. ކޮސްގޮވުމެވެ. ސިއްހަތާއިމެދު ކަންބޮޑުވާނަމަ ސާފުފޯކާއި، ހަޑިފޯއްވެސް ކެއުމާއި ދުރުހެލިވާށެވެ.  ޒަމާނުއްސުރެ ދިވެހިން ބޭނުންކުރާ ހުންޏަކީ ގަލާއި، އަކިރި އަންދައިގެން ދަވާ އުވަ ފުރާނައިގެން ނަގާ ހިމުން ފުށެކެވެ. އޭގެ އަސްލަކީ ރާއްޖޭގެ ރަށްތައް އުފެދިފައިވާ ޒާތުގެ ގަލެވެ. ކެލްސިއަމް ކާބަނޭޓެވެ. ކޯނިޝް ޕައުޑަރަކީ ނުވަތަ ޖިޕްސަން ޕައުޑަރަކީ ޖިޕްސަން ކިޔާ ގަލެއް އަންދައިގެން ހަދާ އުވައެކެވެ. އެއީ ކެލްސިއަލް ސަލްފޭޓް ހެމިހައިޑްރޭޓެވެ. ތަންތަން ބިނދުމުން އަޅާ ޕްލާސްޓަރ އޮފް ޕެރިހަކީވެސް މިބާވަތުގެ އުވައެވެ. މިދެބާވަތަކީވެސް މެޑިކަލް ގުރޭޑުގެ ބޭހުގެ ގޮތުގައި ތައްޔާރުކޮށް ބޭނުންކުރެވޭ ދެބާވަތެވެ. މިއީ ހަށިގަނޑަށް ބޭނުންވާ މާއްދާތަކެއް ނަމަވެސް، އިމާރާތް ކުރުމަށާއި، އެހެނިހެން ސިނާއީ ބޭނުން ތަކުގައި ތައްޔާރުކުރާ މިފަދަ އެއްވެސް އުވައަކީ ފުރާނައިގެން ކަމުގައިވިޔަސް އަނގަޔަށް ލައިގެން ހަފައި ދިރުވައި ހަދަން ހެޔޮވާވަރުގެ ތަކެއްޗެއްނޫނެވެ.      އެހެން ގޮތަކަށް ވިސްނާނަމަ ހިރިގަލު އުވަ ކައިގެން ނުވާ އިތުރު ގެއްލުމެއް ޖިޕްސަން ގަލުގެ އުވަ ކައިގެނެއްވެސް ނުވާނެއެވެ.

ސިއްހަތާއިމެދު ކަންބޮޑުވާނަމަ، ފައިދާއެއްނެތް ކަންކަން ދޫކޮށްލައި، ކެވޭނުކެވޭ އެއްޗެއްގެ އަސްލާއި ނަސްލު ބަލައިހެދުމަކީ އެމީހެއްގެ އަމިއްލަ ހަށިގަނޑާއިމެދު އަދާކުރަންޖެހޭ މުހިއްމު ޒިންމާއެކެވެ. އެއީ ތަހުޒީބުވެ ތަރައްޤީވުމުގެ މުހިއްމު ބައެއްވެސްމެއެވެ.

ލިއުންތެރިން