މީހެއްގެ ކިބައިގާ ހުރި ފަރުވާ ކުޑަކަމަކީ އުނިކަމަކީ ކުރެވޭ ކުށްތަކަކީ ދީނަށް ޚިދުމަތް ކުރުމަށް ހުރި އުޛުރެއް ނޫން ކަމަށް ޖަމްޢިއްޔަތު ވުފޫދުލް ޙަރަމްގެ ރައީސް ފަޟީލަތުއްޝައިޚް ޑރ ޙަމްދާން ބުނު ހުމައިދު އައްސުލަމީ ވިދާޅުވެއްޖެއެވެ. ޝައިޚް މިހެން ވިދާޅުވީ މަސްޖިދުލް ސުލްޠާން މުޙަންމަދު ތަކުރުފާނު އަޢުޒަމްގައި މިއަދު ކުރެއްވި ހުކުރު ނަމާދުގެ އިމާމުވެ ކުރައްވާ ދެއްވި ޚުތުބާ ގައެވެ. މިއަދު ޚުތުބާ ދެއްވަމުން ޝައިޚް އިތުރަށް ވިދާޅުވެފައި ވަނީ “އަހަރަމެންގެ ވާޖިބަކީ މިދީނަށް ޚިދުމަތް ކުރުމެވެ. ﷲތަޢަލާ ތިބާއަށް ރައްކާތެރިކަން ދެއްވާށިއެވެ! ތިބާ މިމުހިންމު ވާޖިބާ މެދު ތަކުރާރުކޮށް ވިސްނާށެވެ. އީމާންކަމުގެ ނަޒަރަކުން މިކަމާމެދު ދެކޭށެވެ. ތިބާގެ ބަޞީރަތުގެ މައިކްރަސްކޯޕަށް ލައިގެން މިކަން ބަލާށެވެ.” މިހެންނެވެ.
މިއަދު މަސްޖިދުލް ސުލްޠާން މުޙަންމަދު ތަކުރުފާނު އަޢުޒަމްގައި ޚުތުބާ ދެއްވާފައި ވަނީ ޢަރަބި ބަހުންނެވެ. މިއަދު އިއްވި ޚުތުބާގެ ދިވެހި ތަރުޖާމާ އެމިސްކިތަށް ހުކުރަށް ދިޔަ އާއްމުންނަށް އިސްލާމީ ކަންތައްތަކާ ބެހޭ ވުޒާރާއިން ބަހާފައި ވެއެވެ.
Leave a Reply