ވޭތުވެ ދިޔަ ހަފްތާގައި ދިވެހިން ފަކުރުން ހޮޑުލައްވާލީ ބަނގުލަދޭޝް ރައްޔިތެއް ކަމުގައިވާ އަރަފާތު ޙޮސައިން އޭނާގެ “ބުޅާ ފެކްޓްރީން” ބުޅަލުގެ މަހުން ކާބޯތަކެތި ހަދާ ވިއްކި ޚަބަރާ އެކުއެވެ. ހެލްތު މިނިސްޓަރ ނޫސްވެރިންނަށް މައުލޫމާތު ދެއްވަމުން ވިދާޅުވަނީ ބުޅަލުގެ މަހުން ކާބޯތަކެތި ހެދިކަން އަދި ޔަޤީން ނުވާކަމަށެވެ. އެހެންވިއްޔާ އަރަފާތު ބުޅަލު މަސް ފެކްޓްރީގެ ފުރިޖްގައި ހުރީ ކީއްކުރާ މަހެއް ހޭ؟ އެއީ ހަމަ އެކަނި އެދުވަހު ކަތިލި ބުޅަލުގެ މަސްހޭ؟ ކޮންމެ ގޮތެއްވިޔަސް ކާބޯތަކެތީގެ ޚިދުމަތް ދޭތަންތަން ބަލާ މޮނިޓަރ ކުރުމަށް ޤާނޫނީ ގޮތުން ޙަވާލުކޮށްފައި ވަނީ ފްޑު އެންޑް ޑްރަގު އޮތޯރިޓީއެވެ. ހެލްތު މިނިސްޓަރ މައުލޫމާތު ދެއްވަމުން ވިދާޅުވީ މިއަހަރުގެ ޖެނުއަރީ މަހުން ފެށިގެން ކާބޯތަކެތި ވިއްކާ 1500 ވުރެ ގިނަ ތަންތަން ބަލާ ފާސް ކުރެވުނު ކަމަށެވެ. ނަމަވެސް އަރަފާތުގެ ބުޅާ ފެކްޓްރީ އަޅައެއް ނުގަނެވެ. ދެކުނު ހާބަރުގައި ހިންގާ ކެފޭތަކުގެ ތެރޭގައި ބުޅާ ދުވާތަން ވެސް އެފް ޑީ އޭގެ މޮނީޓަރުންގެ ޓީމަކަށް ނުފެނެއެވެ.
މާލޭގައި ކޮންމެ ފިހާރައެއްގައި ގުޅައާއި ތެލުލި ފަތާ ރޮއްޓާ ވިއްކާކަން މޮނިޓަރުން ޓީމަށް ނޭގި އޮތީ އެކަން ރިޕޯޓް ނުކުރާތީއެވެ. އެކަމަކު މިމާލޭގައި އުޅޭ ކޮންމެ މީހަކަށްވެސް އެގޭނެ ހަޤީޤަތަކީ ބޯދިއްކޮލި ކޮންމެ ފިހާރައެއްގައި އެއްވެސް ޞިއްޙީ މިންގަޑަކަށް ނުފެތޭ ކާބޯތަކެތި ހުންނަ ކަމެވެ. ރެސޯޓްތަކުން އުކާލާ ކައްކާ ތެޔޮ މާލެ ގެނެސް ހޮޓާތަކުގައި ބޭނުން ކުރާކަށް ނޭނގެނީ ތޯއެވެ. ދެން އެފްޑީއޭ ވިދާޅުވަނީ ފަރުދީ ޒިންމާ އަދާކުރުމަށެވެ. ނަމަވެސް ޤާނޫނުތައް ހަދާ އިދާރާތައް އުފައްދާ ޓެކްސް ފައިސާއިން މުސާރަ ދީފައި އެކިފެންވަރުގެ މުއައްޒަފުން ހަމަ ޖައްސަން ޖެހެނީ އެންމެން ފަރުދީ ޒިންމާ އަދާ ނުކުރާތީއެވެ. ކަންކަން ބަލަން މޮނިޓަރ ކުރަން ބަޔަކު ތިބެން ޖެހޭތީއެވެ.
ބޭހެއް ބޭނުން ކުރާ އެތައް ދުވަހެއް ފަހު ނުރައްކާތެރި ބާވަތެއް ހުރެގެން މަނާ ކުރާ އިރު އެބޭސް ދިވެހިން ބޭނުން ކުރާތާ އެތައް ދުވަހެއް އޮންނަނީ ވެފައެވެ. ލިބޭނެ ހުރިހާ ގެއްލުމެއް އޮންނަނީ ލިބި ނިމިފައެވެ. ރާއްޖެއަށް ބޭހެއް އެތެރެ ކުރާއިރު ބޭހެއްގެ ފެންވަރު ޗެކް ކުރެވޭނެ ގޮތް ނެތީތޯއެވެ. ދެރަ ކަމެކެވެ. ކޮންމެފަދަ ޚަރަދެއް ކޮށްގެންވެސް މިފަދަ ތަނެއް ހަދާކަށް ނުވޭތޯއެވެ. މިއީ އިންސާނުންގެ ފުރާނަ އާއި ދިރިހުރުމާ ގުޅޭ ބޮޑު މައްސަލައެކެވެ.
Leave a Reply